Խօսք Ամանորի

Նոր տարուայ շեմին ենք։ Մի քանի ժամից կ’աւարտուի 2023 թուականը եւ մեր առջեւ կը բացուի մի նոր տարի։

Յետադարձ հայացք նետելով անցնող տարուան կարող ենք հաստատել, որ այն լի էր այլազան իրադարձութիւններով, ձեռքբերումներով, բայց նաեւ ցաւալի կորուստներով։ Ցաւօք, աշխարհը շարունակում է բախուել լուրջ ու մտահոգիչ մարտահրաւէրների: Ուկրաինայում դաժան պատերազմը շարունակւում է եւ պատճառ դառնում հարիւրաւոր նոր զոհերի եւ մեծածաւալ աւերածութիւնների։ Կրկին փոթորկւում է նաեւ Մերձաւոր Արեւելքը՝ իր հետ բերելով մարդկային նոր տառապանք, աւերածութիւններ, բազմահազար զոհեր ու ատելավառ թշնամութիւններ։

Լաչինի միջանցքի շրջափակման պատճառով Արցախում հումանիտար աղետի հետ կապուած մեր մտահոգութիւններն աւարտուեցին էլ աւելի մեծ տառապանքով, այն է՝ մեր սիրելի Արցախի կորստով։ Միջազգային հանրութեան աչքի առաջ Ադրբեջանը բռնի ուժով վտարեց շուրջ 120 հազար հայի իրենց պապենական հայրենիքից եւ հայաթափեց Լեռնային Ղարաբաղը։ Այս կորուստը խորը վէրքեր է թողել մեր սրտի եւ յուզական աշխարհի վրայ, խոցել է մեր ազգային հաւաքական արժանապատւութիւնը։

Արցախցի մեր քոյրերի ու եղբայրների տառապանքն ու անասելի զրկանքները շարունակում են մեծ ցաւ պատճառել մեզ։ Արցախցիներից խլուել է մարդկային ամենատարրական իրաւունքը՝ իր հող ու ջրի վրայ իր ազատ ապրելու եւ արարելու իրաւունքը։ Աներեւակայելի էր հաւատալ, որ 21-րդ դարում հնարաւոր էր այն, ինչ կատարուեց նրանց հետ։ Մի ամբողջ ժողովուրդ բռնի կերպով զրկուեց իր հայրենիքից եւ տեղահան եղաւ։

Աշխարհն իրաւունք չունի այս ահաւոր ոճրագործութիւնը հանդուրժել։ Արցախցին պէտք է միջազգային յստակ երաշխիքների առկայութեամբ իր պապենական տունը վերադառնալու առարկայական հնարաւորութիւն ստանայ։ Միջազգային հանրութիւնը պարտաւոր է դիւանագիտական ու տնտեսական բոլոր հնարաւոր միջոցներով ստիպել Ադրբեջանին՝ յարգել արցախցիների ոտնահարուած իրաւունքները։ Չի կարելի հանդուրժել, որ 21-րդ դարում բռնութեան ուժը որոշի մարդկանց ճակատագիրը։ Սա շատ վտանգաւոր նոր նախադէպ է նորօրեայ պատմութեան մէջ, ինչպէս որ նախադէպ էր շուրջ 110 տարի առաջ տեղի ունեցած թուրքական ցեղասպանութիւնը հայերի հանդէպ։

Ադրբեջանի իշխանութիւնների ագրեսիւ քաղաքականութեան հետեւանքով շարունակում է լարուած մնալ նաեւ Հայաստանի սահմանամերձ շրջանների իրավիճակը, Հայաստանը կանգնած է անվտանգային եւ տնտեսական նոր մարտահրաւէրների առաջ։

Այս ամէնը չէր եւ չի կարող անտարբեր թողնել մեզ Գերմանիայում։ Արցախի տեղահանուած մեր քոյրերին եւ եղբայրներին օգնելու համար սեպտեմբերի վերջին սկսեցինք դրամահաւաքի արշաւ եւ նախնական օգնութիւն ցուցաբերեցինք բազմաթիւ ընտանիքների։ Դրամահաւաքի շնորհիւ հաւաքուած գումարներով Առաջնորդարանը ներկայիս փորձում է հիմնականում օգնութիւն ցուցաբերել ինքնօգնութեան համար, որպէսզի ընտանիքներին հնարաւորութիւն ընձեռենք նորից վերակազմակերպել կեանքը Հայաստանում եւ երկարաժամկէտ կերպով ապահովել իրենց ապրուստը ապագայում: Առիթն օգտագործելով կ’ուզէի շնորհակալութիւն յայտնել բոլոր նրանց, որոնք իրենց փոքր ու մեծ նուիրատւութիւններով մասնակցեցին ի նպաստ տեղահանուած արցախցիների մեր դրամահաւաքին։ Աստուած պահապան։

2023 թ․ դեկտեմբերին մենք կրկին կազմակերպեցինք «Սուրբ Ծննդեան ուրախութիւն» ամենամեայ մեր դրամահաւաքը։ Այս անգամ ծրագրի օգտատէրեր կը լինեն Հայաստանի Սիւնիքի մարզի սահմանամերձ բնակավայրերում ապրող բազում բազմազաւակ ընտանիքներ, որոնց կը բաժանուեն առաջին անհրաժեշտութեան սնունդ եւ հիգիենայի պարագաներ, մեր Թեմի ներկայացուցիչ հոգեւորականը Սիւնեաց Թեմի հոգեւորականների ուղեկցութեամբ տեղում կ’այցելի մի շարք ընտանիքներ՝ նրանց ջերմութիւն, ուրախութիւն, յոյս եւ օրհնութիւն փոխանցելու համար։ Շնորհակալութիւն եւ օրհնութիւն նաեւ այս գեղեցիկ ծրագրի բոլոր նուիրատուներին։

Սիրելի քոյրեր եւ եղբայրներ,

Հակառակ անցնող տարուայ մտահոգիչ զարգացումներին, կը ցանկանայի այս պահին նաեւ երախտագիտութեամբ յետադարձ հայացք նետել անցնող տարուան եւ անկեղծ շնորհակալություններս յայտնել բոլոր այն անձերին, որոնք նուիրուածութեամբ կատարեցին ու կատարում են իրենց կամաւոր ծառայութիւնը՝ ապահովելու համար մեր համայնքային անխափան կենսագործունէութիւնը: Մեր համայնքներից ներս տեղի ունեցած բազմաթիւ հանդիպումներ, այդ թւում նաեւ 2023 թուականին, ինձ հնարաւորութիւն տուեցին արժեքաւոր կապեր հաստատել մեր համայնքի անդամների հետ: Միջեկեղեցական զանազան ձեռնարկների եւ հանդիպումների միջոցով մենք կարողացանք աւելի շարունակել եւ զարգացնել մեր յարաբերութիւններն ու համագործակցութիւնը մեր քոյր եկեղեցիների հետ:

Գալիք տարին մեր առջեւ է դատարկ գրքի պէս, որի էջերը մենք հրաւիրուած ենք լցնելու սիրով, բարութեամբ, կարեկցանքով ու առաջընթացով: Իւրաքանչիւր բացուող նոր տարի դրական փոփոխութիւնների ներուժ է պարունակում իր մէջ։ Եկէք միասին դիմաւորենք նոր տարին այն գիտակցութեամբ, որ Տերն առաջնորդում է մեզ եւ մեզ պահում Իր ձեռքերում։ Մաղթում եմ, որ Հայ եկեղեցին Գերմանիայում շարունակի մնալ սիրոյ, մխիթարութեան ու յոյսի վայր։ Հրաւիրում եմ բոլորիդ նոր տարին սկսել Աստծոյ հանդէպ հաստատուն վստահութեամբ եւ փոխադարձաբար զօրացնել միմեանց:

Անցնող տարուայ համար երախտագիտութեամբ եւ գալիք տարուայ դրական յոյսով` տարեմուտի այս երեկոյ իմ ջերմ ողջոյններն ու բարեմաղթանքներն եմ յղում Գերմանահայ մեր ողջ համայնքին, մասնաւորաբար՝ մեր թեմական մարմինների բոլոր անդամներին, հոգեւորականաց դասին, Սբ․ խորանի բոլոր սպասարկողներին ու երգչախմբերի անդամներին, ինչպէս նաեւ մեր եկեղեցական ու աշխարհիկ հաստատութիւնների, համայնքների ու միութիւնների բոլոր պատասխանատուներին։ Թող 2024 թուականը բոլորիս համար լինի առողջութեան ու խաղաղութեան տարի եւ Աստծոյ օրհնութիւնը առատօրէն իջնի բոլորիս վրայ։ Աղօթքով առ Աստուած հայցում եմ, որ Տէրը զօրացնի Գերմանահայ մեր համայնքը եւ ամրացնի մեզ մեր հաւատքի մէջ։

«Միշտ միմեանց հանդէպ եւ բոլորի հանդէպ բարին գործելու հետամուտ եղէք։ Ուրախ եղէք միշտ, անդադար աղօթեցէք, ամէն ինչում գոհութիւն մատուցեցէք, որովհետեւ ա՛յդ է Աստծու կամքը ձեզ համար ի Քրիստոս Յիսուս» (Ա Թս Ե 15բ-18)։

Շնորհաւոր Ամանոր եւ Սուրբ Ծնունդ: