7 եւ 8 Նոյեմբեր 2026-ին, առաջնորդանիստ Քէօլն քաղաքում, տեղի ունեցաւ Հայ Եկեղեցու Գերմանիայի Թեմի Թեմական-Պատգամաւորական Ժողովը (ԹՊԺ), որին մասնակցում էին Գերմանիայի 17 հայկական եկեղեցական համայնքները ներկայացնող շուրջ 60 հոգեւորական եւ աշխարհական պատգամաւորներ։ Ժողովը գումարուեց թեմակալ առաջնորդ գերաշնորհ Տ․ Սերովբէ եպիսկոպոս Իսախանեանի նախագահութեամբ եւ պրոֆ. դոկտոր Խաչիկ Գազերի ատենապետութեամբ։
ԹՊԺ-ը Թեմի բարձրագույն ներկայացուցչական մարմինն է, որի գումարման ընթացքում հոգեւորական ու աշխարհական պատգամաւորները միասնաբար քննարկում են Թեմը յուզող հարցեր, արժեւորում անցեալ տարեշրջանի աշխատանքները եւ անդրադառնում թեմական-համայնքային-եկեղեցական կեանքի հետագայ զարգացման առաջնահերթութիւններին։
Ժողովի առաջին նիստը
Շաբաթ, 7 Նոյեմբերին կայացած առաջին նիստը սկսուեց թեմակալ առաջնորդ Սերովբէ սրբազանի բացման աղօթքով եւ ողջոյնի խօսքով, որից յետոյ կատարուեց պատգամաւորների ներկայութեան ստուգումը եւ հաստատուեց ժողովի օրինականութիւնը։ Այնուհետեւ ժողովը պաշտօնապէս բացուեց Դիւանի ատենապետ դոկտոր Գազերի կողմից, ներկայացուեց եւ հաստատուեց օրակարգը, ինչպէս նաեւ վաւերացուեց նախորդ 2025 թ․ Թեմական-Պատգամաւորական Ժողովի ատենագրութիւնը։
Օրակարգի կարեւոր բաժիններից մէկն էր Գերմանիայի Հայոց Թեմի 2025 թուականի գործունէութեան տեղեկագրութեան (Սերովբէ սրբազան) եւ նիւթական հաշուետուութեան (Արթին Սիմոնեան, գանձապահ) ներկայացումն ու քննարկումը։ Անդրադարձ կատարուեց հաշուետու տարուայ ընթացքին Թեմի կողմից իրականացուած աշխատանքներին, Թեմի եկեղեցական, մշակութային, միջեկեղեցական ու վարչական գործունէութեանը։
ԹՊԺ-ը խորը մտահոգութեամբ անդրադարձաւ նաեւ Հայաստանի Հանրապետութեան քաղաքական իշխանութիւնների ու Հայաստանեայց Առաքելական Եկեղեցու միջեւ այլեւս չափազանց խորացող լարուածութեանը։ Այս առնչութեամբ ԹՊԺ-ը հանդէս եկաւ Յայտարարութեամբ։
Ժողովի երկրորդ նիստը
Կիրակի, 8 Նոյեմբերին ԹՊԺ-ի աշխատանքները շարունակուեցին երկրորդ նիստով։ Մինչ այդ, առաւօտեան ժամը 9։30-ին, Թեմի հոգեւոր դասի կողմից առաջնորդանիստ «Սբ․ Սահակ-Սբ․ Մեսրոպ» եկեղեցում կատարուեց Արեւագալի ժամերգութիւն՝ ներկայութեամբ պատգամաւորների։
Երկրորդ նիստի ընթացքում հիմնական ուշադրութիւնը կենտրոնացաւ Թեմի հովանու ներքոյ գործող համայնքների առօրեայ կեանքին եւ գործունէութեան վերաբերող հարցերի վրայ։ Պատգամաւորները հնարաւորութիւն ունեցան բարձրաձայնելու իրենց համայնքների կարիքները, ներկայացնելու առկայ խնդիրները, մտահոգութիւններն ու առաջարկութիւնները։
Ներկայացուեցին նաեւ ԹՊԺ-ի կողմից ստեղծուած աշխատանքային խմբերի քննարկումների արդիւնքները եւ լսուեցին համապատասխան զեկոյցներն ու առաջարկները։
Համայնքային հարցերի եւ աշխատանքային խմբերի զեկոյցների քննարկումները կարեւոր հնարաւորութիւն ընձեռեցին համադրելու տարբեր համայնքներու փորձառութիւնը, բացայայտելու ընդհանուր մարտահրաւէրները եւ նախանշելու համագործակցութեան նոր կարելիութիւններ։
Երկօրեայ Թեմական-Պատգամաւորական Ժողովը դարձաւ ոչ միայն հաշուետու ժամանակաշրջանի աշխատանքներն ամփոփելու, այլեւ Թեմի ներկայ կացութեան, համայնքային կեանքի կարիքների եւ ապագայ անելիքների շուրջ համատեղ խորհրդածութեան ու մտքերի փոխանակման կարեւոր հարթակ։
Շուրջ 60 հոգեւորական եւ աշխարհական պատգամաւորների մասնակցութիւնը եւս մէկ անգամ ընդգծեց Թեմի համայնքների փոխադարձ հաղորդակցութեան եւ միասնական պատասխանատուութեան կարեւորութիւնը։ Թեմական-Պատգամաւորական Ժողովը վերահաստատեց, որ այս առաքելութեան իրականացման համար անհրաժեշտ են համատեղ ջանքեր, փոխադարձ վստահութիւն, կառուցողական երկխօսութիւն եւ պատասխանատուութեան գիտակցում։
35-րդ Թեմական-Պատգամաւորական Ժողովն աւարտեց իր երկօրեայ աշխատանքները Թեմակալ առաջնորդ Սերովբէ եպիսկոպոս Իսախանեանի օրհնութեան աղօթքով եւ միասնական արտասանուած Տէրունական աղօթքով։
Դիւան
Թեմական-Պատգամաւորական Ժողովի